नेकपा माओवादी केन्द्रका अध्यक्ष पुष्पकमल दाहालले चुनावी गठवन्धनबारे कांग्रेसका केही नेता अतिवादी बनेको गुनासो गरेका छन् । बिहीबार बिहान बुटवलमा आयाोजित पत्रकार सम्मेलनमा अध्यक्ष दाहालले कांग्रेसका केही नेताका कारण एमालेसंगको सहकार्य हुन सक्ने बताएका हुन् ।

अध्यक्ष दाहालले राजनीति सम्भावनाको खेल भएकोले परिस्थिति बदलिन पनि सक्ने चेतावनी दिएका छन् । उनले प्रधानमन्त्री तथा कांग्रेस सभापति शेरबहादुर देउवाले गठबन्धनको विपक्षमा नबोल्न निर्देशन दिएकोले आफूहरुले धैर्य गरेको बताए । उनले प्रधानमन्त्री देउवाल यो गठबन्धनलाई बचाएर लैजाने पक्षमा रहेको बताए । यद्यपि, आफ्नो पार्टीले आफ्नै तागतमा चुनाव लड्ने कुरालाई प्राथमितामा राख्ने उनको भनाइ थियो । अध्यक्ष दाहालले गठवन्धन होला र जितौंला भन्ने मनस्थितिमा नबस्न पनि कार्यकर्तालाई आग्रह गरे । दाहालले चुनाव हुन्छ वा हुँदैन भन्ने संशयको अवस्था अझै व्याप्त रहेको पनि संकेत गरे ।