सभामुख अग्नि सापकोटाले प्रमुख प्रतिपक्षी नेकपा एमालेले जारी गरेको प्रेस वक्तव्यप्रति आपत्ति जनाएका छन् । सभामुख सापकोटाको सचिवालयले बुधबार बिज्ञप्ती जारी गर्दै आफूले बोल्दै नबोलेको कुरा प्रचार गरेको आरोप लगाएको छ । एमालेले एमसीसीलगायतका विषयमा स्पष्ट पार्न मंगलबार जारी गरेको वक्तव्यमा ‘एमसीसीसम्बन्धी प्रस्ताव टेबल गर्नुपरेमा आत्महत्या गर्छु भन्नेजस्ता आवेगपूर्ण अभिव्यक्ति’ सभामुखले दिएको आरोप लगाएको थियो ।

सभामुख सचिवालयले यो बिषय अफवाह फैलाउन खोजिएको र राजनैतिक पूर्वाग्रहबाट प्रेरित भएर प्रचार गरेको भन्दै आपत्ति जनाएको हो । सभामुखले बोलेको भनेर प्रचार गरिएका विषयको पुष्टि गर्न समेत एमालेलाई सभामुखले चुनौती दिएका छन् ।