सगरमाथाको उच्च भागमा रहेको हिमनदी पग्लिने क्रम बढेको अध्ययनले देखाएको छ । अमेरिकाको मेइन विश्वविद्यालयले नेतृत्व गरेको शोधकर्ताहरूको टोलीले गरेको अध्ययनमा सगरमाथामा रहेको हिमनदी ‘साउथ कोल ग्लासियर’ पग्लिएको देखिएको हो ।

अध्ययनमा पछिल्लो २५ वर्षमा साउथ कोल हिमनदीको एक सय ८० फिटभन्दा धेरै हिउँ पग्लिएको पाइएको छ । २५ हजार ९३८ फिटको उचाइमा रहेको हिमनदी बनेको बेलाभन्दा अहिले ८० गुणा बढी पातलिएको देखिएको हो । सन् १९९० देखि हिमनदीको बरफ पग्लिन थालेको र ३० वर्षको अवधिमा यसअघि दुई हजार वर्ष लागेर बनेको बरफ पग्लिसकेको बताइएको छ ।

जलवायु परिवर्तनको असरका कारण हिमनदी तीव्र गतिमा पग्लिरहेको सोधकर्ताहरुले बताएका छन । बाक्लो हिउँ पग्लिएपछि सगरमाथाको माथिल्लो भेगमा चट्टान देखिन थालेको बताइएको छ । दश जना वैज्ञानिकहरूको टोली हिमनदीमा पुगेर अध्ययन गरेका हुन् । अध्ययन टोलीले विश्वकै सबैभन्दा अग्लो मौसम मापन गर्ने स्टेसन स्थापना गर्नुका साथै बरफको नमुना समेत संकलन गरेका छन ।