स्वास्थ्य तथा जनसंख्या मन्त्री बिरोध खतिवडाले सरकार अनावश्यक लकडाउन गर्ने पक्षमा नरहेको बताएका छन् ।बिहीवार काठमाडौँमा आयोजित एक कार्यक्रममा मन्त्री खतिवडाले यसअघि अन्य देशहरुको अवस्था हेरेर लकडाउन गरेपनि अब आवश्यक ठाउँ हेरेर मात्रै लकडाउन गरिने बताएका हुन् । उनले यसअघिका लकडाउनले देशको आर्थिक, सामाजिक र शैक्षिक क्षेत्रमा धेरै असर गरेको भन्दै अब सरकार लकडाउनको विकल्पमा जाने बताए ।

मन्त्री खतिवडाले कोरोनाको तेस्रो भेरियन्टबाट बच्न होसियार रहनुपर्ने भन्दै स्वास्थ्य मापदण्डको अनिवार्य प्रयोग गर्न र दुवै मात्रा खोप लगाउन पनि आग्रह गरे । उनले आगामी माघ पहिलो हप्ताबाट अग्रपंक्तिमा रहेर काम गर्नेहरुलाई बुस्टर डोजको व्यवस्था गरिएको जानकारी पनि दिए । उनले माघको दोस्रो हप्तामा ६० वर्ष माथि उमेर समूहका नागरिक र तेस्रो वा चौथो हप्ताबाट आम नागरिकहरुलाई कोरोना बिरुद्धको बुस्टर डोज उपलब्ध गराउने बताए ।

मन्त्री खतिवडाले खोप सहज बनाउनका लागि सरकारले विद्यालयहरुलाई नै खोप केन्द्र बनाएको पनि बताए । उनले खोप केन्द्रहरुमा भिड हुन नदिन थप केन्द्रहरु थप्ने प्रतिवद्धता पनि जनाए ।