नेपाल विद्युत् प्राधिकरणले छ महिनाभित्र ५० वटा चार्जिङ स्टेसनको निर्माण सक्ने भएको छ । एसियाली विकास बैङ्कको आर्थिक सहयोगमा विद्युतीय सवारी साधनका लागि प्रमुख राजमार्गका ३२ स्थानमा चार्जिङ स्टेसन निर्माण भैरहेका हुन ।

प्राधिकरणका अनुसार स्टेसन रहने स्थानको पहिचान गरेर चार्जर मेसिन खरिदको सम्झौता भएर काम अघि बढिसकेको छ । केहीमा तीनवटा र केहीमा छवटा सवारी एकैसाथ चार्ज हुने गरी स्टेसन निर्माण भइरहेको हो । हरेक प्रदेशमा पाँचवटा स्टेसन रहनेछन् । काठमाडौँ उपत्यकामा १० वटा र बाँकी पाँचवटा अन्य आवश्यक स्थानमा स्टेसन हुनेछन् ।

चार्जिङ स्टेसन पूर्वपश्चिम, पृथ्वी, सिद्धार्थ, बीपी र मदन भण्डारी लगायतका राजमार्गमा राखिनेछ । स्टेसनहरू सय किलोमिटर दूरीको अन्तरमा रहनेछन् । विद्युतीय स्टेसनबाट कार आधा घन्टा र बस एक घन्टामा पूर्ण रूपमा चार्ज हुने प्राधिकरणले जनाएको छ ।

एउटा चार्जिङ स्टेसन निर्माणमा करिब ८० लाख रुपियाँ लगानी गरिएको छ । ५० वटा स्टेसन निर्माणको लागत ४० करोड रुपियाँ छ । मोबाइल एप्सबाट चार्ज गर्ने समय र स्थान बुक गर्नुका साथै अनलाइन भुक्तानी गर्न सकिने व्यवस्था समेत प्राधिकरणले मिलाउन लागेको छ ।