देशभर हालसम्म लक्षित जनसंख्याको २८ प्रतिशतभन्दा धेरैले कोरोनाविरुद्धको पूर्ण खोप लगाइसकेको स्वास्थ्य मन्त्रालयले जनाएको छ । हालसम्म एक करोड २९ लाख मात्रा खोप लगाइसकिएको मन्त्रालयले जनाएको हो ।

नेपालमा हालसम्म एक करोड ७८ लाख ५८ हजार ७ सय १० मात्रा कोरोना विरुद्धको खोप आएको छ । नेपालले विभिन्न देशबाट उक्त खोप ल्याएको हो  । सबैभन्दा धेरै चीनबाट एक करोड १९ लाख मात्रा भेरोसेल खोप आएको छ ।

त्यसपछि धेरै आउनेमा भारतमा बनेको कोभिसिल्ड खोप रहेको छ । कोभिसिल्ड खोप २४ लाख ४८ हजार मात्रा भित्रिएको छ । यस्तै बेलायतमा उत्पादन भएको एस्ट्राजेनेका खोप १९ लाख ७५ हजार ८ सय ६० मात्रा, जोनसन एन्ड जोन्सन १५ लाख ३४ हजार ८ सय ५० मात्रा रहेका छन् ।

भारतले अनुदानमा दिएको १० लाख मात्रा खोप नेपाल आएपछि गत माघ १४ गतेबाट नेपालमा खोप अभियान सुरु भएको थियो । खोपपछि कोरोना सङ्क्रमणदर ५२ दशमलब ३ प्रतिशतले घटेको छ । गत महिना ३६ हजार ८ सय ६१ जना अर्थात् ४दशमलब ८६ प्रतिशत सक्रिय सङ्क्रमित रहेकोमा अहिले घटेर १८ हजार ४ सय २२ अर्थात् २ दशमलब ३२ प्रतिशतमा झरेको छ ।