प्रधानमन्त्री शेरबहादुर देउवाले बोलाएको सर्वदलिय बैठकले संसद सुचारु गर्ने विषयमा जिम्मेवार ढंगले प्रस्तुत हुन प्रमुख प्रतिपक्षी दल नेकपा एमालेलाई आग्रह गरेको छ । प्रधानमन्त्री निवास बालुवाटारमा बसेको बैठकमा संसदमा प्रतिनिधित्व गर्ने दलहरु र पूर्वप्रधानमन्त्रीलाई बोलाइएको भएपनि नेकपा एमाले र राष्ट्रिय प्रजातन्त्र पार्टी भने सहभागि भएन ।

बैठकले संघीय संसदमा अवरोध जारी रहँदा जनतासँग प्रत्यक्ष सरोकार राख्ने काममा बाधा पुग्ने भन्दै वार्ताबाट समाधान खोज्न एमालेलाई आग्रह गर्ने निर्णय गरेको हो ।

सत्तारुढ दलहरुले मुलुकमा वार्ता र संवाद आवश्यक भइरहेको अवस्थामा एमाले संवादबाट पर भागेको आरोप लगाएका छन् । उनीहरुले एमालेलाई वार्ता र सवादबाट नभाग्न समेत आग्रह गरे ।

बैठकमा संसद्लाई मर्यादित र निर्वाध रुपमा सञ्चालन गर्नका लागि एमाले अध्यक्ष केपी ओलीको भूमिका सकारात्मक रहने अपेक्षा प्रधानमन्त्री देउवाले गरेको कानुनमन्त्री ज्ञानेन्द्र बहादुर कार्कीले जानकारी दिए । मन्त्री कार्कीले संसद अधिवेशन अन्त्य गर्ने सोच सरकारको नभएको भन्दै संसदलाई नियमित र मर्यादित बनाएर चलाउन चाहेको स्पष्ट पारे ।