अख्तियार दुरुपयोग अनुसन्धान आयोगले प्रदेश २ को मुख्यमन्त्री तथा मन्त्रिपरिषद्को कार्यालयमा छापा मारेर कागजात नियन्त्रणमा लिएको छ । बुधबार बर्दिबासस्थित अख्तियारको कार्यालयबाट गएको टोलीले कार्यालयमा छापा मारेर कागजात नियन्त्रणमा लिएको हो ।

‘बेटि पढाउ बेटि वचाउ’ अभियान अन्तरगतको छात्रालाई बाँड्न किनेको साइकलमा अनियमितता भएको आशंकामा अख्तियारको टोलीले कार्यालयमा छापा मारेको हो । साइकल खरिदमा अनियमितता भएको उजुरी आएको र सोहि अनुसार छानवीनमा लागेको अख्तियार दुरुपयोग अनुसन्धान आयोग बर्दिवासका उपसचिव मेघनाथ रिमालले बताए ।

प्रदेश सरकारको महत्वाकांक्षी योजना मध्ये एक ‘वेटी पढाउ वेटी वचाउ’ अन्तरगत साइकल खरिदमा व्यापक अनियमीतता भएको आरोप प्रदेश सरकारमाथि लागेको छ । मुख्यमन्त्री तथा मन्त्रिपरिषद् कार्यालयले दुई चरणमा गरी २७ हजार २ सय ६२ थान साइकल खरिद गरेको थियो ।

यसैबीच प्रदेश २ का मुख्यमन्त्री लालबाबु राउतले सरकार प्रमुखको कार्यालयमा ‘छापामार’ शैलीमा अख्तियार दुरुपयोग अनुसन्धान आयोगले फायल नियन्त्रणमा लिएको भन्दै आपत्ति जनाएका छन् । उनले अख्तियारको तरिका ठीक नभएको भन्दै आयोगका प्रमुख प्रेम राईलाई समेत फोन गरेका छन् ।