भारतको राजधानी नयाँ दिल्लीस्थित एक अदालतभित्र गोली चल्दा तीन जनाको मृत्यु भएको छ । घटनामा परी कयौँ घाइते भएका छन् । जितेन्दर गोगी नामक ग्याङस्टरलाई विरोधी समूहले अदालतभित्रै गोली हानी हत्या गरेको बताइएको छ ।

उत्तरी दिल्लीको रोहिणीमा रहेको अदालतमा वकिलका भेषमा आएका दुई जनाले गोली चलाएको बताइएको छ । जितेन्दर गोगी कयौँ अपराधमा मुछिएका कुख्यात ग्याङस्टर थिए ।

तिहार जेलमा भएका उनलाई शुक्रबार अदालतमा उपस्थित गराइँदै थियो । ‘टिल्लु ग्याङ’ ले गोगीको हत्या गरेको प्रहरीले बताएको छ । ‘विरोधी ग्याङका दुई जनाले अदालतभित्र गोगीमाथि गोली चलाएको र प्रहरीले जवाफी कारबाही गर्दा दुवै जना मारिएको प्रहरीले जनाएको छ ।