नेकपा एमालेका अध्यक्ष केपी ओलीले माधव नेपाल र पुष्पकमल दाहालले कम्युनिष्टको नयाँ मुकुण्डो ओढेर हिडेको आरोप लगाएका छन् । नेकपा एमाले बाँकेले नेपालगन्जमा आयोजित कार्यकर्ता भेलामा नेपाल र दाहालले पार्टीको नारामा शेरबहादुरवाद लेख्न छुटाएको टिप्पणी गरे । ओलीले देउवाका पिछलग्गु माधव र दाहालको दम्ब र शेखी आउने चुनावमा जनताले झार्ने बताए ।

अध्यक्ष ओलीले अहिले गठबन्धनको नाममा बनेको सरकारले झुठो बोल्ने भन्दा केही काम गर्न नसकेको बताउँदै अघिल्लो सरकारले ल्याएको महत्त्वपूर्ण विकास खारेज गरेकोमा आपत्ति जनाए ।

आफ्नो सरकारले गरेको कामको जनतामा छर्लङ्ग भएको भन्दै पूर्व प्रधानमन्त्री ओलीले तीब्र आर्थिक विकासमा विश्वका १० मुलुकमा नेपाल रहेको र सामाजिक विकासमा पनि नेपाल नमुनाका रूपमा स्थापित गरिएको उल्लेख गरे । कार्यक्रममा एमाले स्थानीय कमिटी सदस्य शंकर पोख्रेलले बिधि र पद्धतीको कुरा उठाउने माधव नेपाल र उनका कार्यकर्ताहरु स्वार्थका लागि परेको बताए ।