चीनसँग खरिद गरिएको खोप लिन नेपाल वायु सेवा निगमको वाइडवडी जहाज आज बेइजिङ प्रस्थान गरेको छ । आज साँझ पौने छ बजे बेइजिङ प्रस्थान गरेको जहाजले शुक्रबार चिनियाँ खोप भेरोसेल ल्याउने छ ।

निगमको जहाजले ४४ लाख मात्रा भेरोसेल ल्याउने स्वास्थ्य मन्त्रालयले जानकारी दिएको छ । अब भित्रने भेरोसेल ४० बर्ष माथि उमेर समूहलाई दिने सरकारको तयारी छ ।

सरकारले चीनसँग पछिल्लो पटक खरिद गरेको ६० लाख मात्रामध्ये १६ लाख मात्रा भदौ पहिलो साता नै नेपाल आइसकेको छ । नेपालमा हालसम्म भारतबाट २४ लाख ४८ हजार मात्रा कोभिसिल्ड, चीनबाट विभिन्न चरणमा ७४ लाख मात्रा भेरोसेल, अमेरिकाबाट १६ लाख मात्रा जोन्सन एन्ड जोन्सन, जापानबाट १७ लाख ७७ हजार ३ सय २० मात्रा अस्ट्राजेनेकाको खोप आएको छ ।

असोजमा गाभीमार्फत १ लाख मात्रा फाइजर खोप आउने क्रममा रहेको छ । यही वर्षको अन्तिमसम्ममा फाइजरको ६० लाख मात्रा र मोडर्नाको ४० लाख मात्रा खोप पनि आउने बताइएको छ । यी खोप १८ वर्षमुनि उमेर समूहलाई लगाउने सरकारले बताएको छ । हालसम्म ५२ लाख ४३ हजार २ सय ३६ जनाले पुर्ण र ५८ लाख ७७ हजार ७९ जनाले पहिलो मात्रा खोप लगाएका छन् ।