नेकपा एकीकृत समाजवादीको विद्यार्थी संगठनले भारतीय प्रधानमन्त्री नरेन्द्र मोदीको पुतला दहन गरेको छ । दार्चुलाको महाकाली नदीमा जयसिंह धामी बेपत्ता प्रकरणलाई लिएर प्रदर्शनीमार्गस्थित रत्नराज्य क्याम्पसमा संगठनका कार्यकर्ताहरुले मोदीको पुतला दहन गरेका हुन् । सरकारले धामीको बारेमा सत्य तथ्य बाहिर ल्याउन र नेपाली आकाशमा अनधिकृत भारतीय उडान गरेको विषयमा सरकार चुप लागेर बसेको उनीहरुको आरोप थियो ।

जयसिंह धामी साउन १५ गते गाउँबाट सदरमुकाम खलङ्गा जाने क्रममा एसएसबीले तुइन फुकालिदिँदा बेपत्ता भएका थिए ।

सरकारले साउन १७ गते घटनाबारे अनुसन्धान गर्न पाँच सदस्य छानबिन समिति गठन गरेको थियो । उक्त समितिले जयसिंह धामी बेपत्ता हुनुमा भारतीय सीमा सुरक्षा बल (एसएसबी)को संलग्नता रहेको उल्लेख गर्दै दोषी उपर कानुनी कारबाहीका लागि भारतसँग कुटनीतिक पहल गर्न सुझावसमेत दिएको थियो ।