नेकपा एमालेले दार्चुलाका जयसिंह धामी महाकाली नदीमा बेपत्ता भएको घटनालाई सरकारले थामथुम गर्न खोजेको आरोप लगाएको छ । एमाले प्रवक्ता प्रदीप ज्ञवालीले बिहीबार विज्ञप्ती प्रकाशित गर्दै सरकारले तयार पारेको छानविन प्रतिवेदन अस्पष्ट रहेको र सरकार यस घटनालाई थामथुम गर्ने प्रयासमा लागेको देखिएको जनाएका हुन ।

नागरिक वेपत्ता पारिएको संवेदनशील घटनाका सम्बन्धमा भारतीय पक्षसँग जानकारी लिने, सोधपुछ गर्ने र आपत्ति जनाउने सामान्य औपचारिकता समेत सरकारले पुरा नगरेको भन्दै एमालेले आपत्ति समेत जनाएको छ । विज्ञप्तीमा कूटनीतिक पहल गर्न नसक्ने सरकारले नेपाली जनताको ध्यान यस घटनाबाट अन्यत्रै मोड्न खोजेको आशंका पैदा भएको समेत उल्लेख गरिएको छ ।

विज्ञप्तिमा अविलम्ब घटनाको सत्यतथ्य सार्वजनिक गर्न, दोषीलाई कार्बाही र पीडित परिवारलाई न्याय सुनिश्चित गर्न समेत माग गरिएको छ ।