महाकाली नदी पार गर्नेक्रममा भारतीय सशस्त्र सीमा बल ‘एसएसबी’का जवानले तुइनको लठ्ठा खुस्काइदिएपछि नेपालीको मृत्यु भएको विषयमा गृहले परराष्ट्र मन्त्रालयलाई पत्राचार गरेको छ । लठ्ठा खुस्काउदा नेपाली युवा जयसिंह धामी बेपत्ता भएको घटनाको अनुसन्धान र पीडितलाई उचित क्षतिपूर्ति भराउने गरी भारतसँग कूटनीतिक पहलका लागि गृहले पत्र पठाएको हो ।

कूटनीतिक पहलका लागि गरिने विषयबारे आन्तरिक समीक्षा, परामर्शपछि गृहले परराष्ट्रलाई पत्राचार गरेको हो । सहसचिव जनार्दन गौतमको संयोजकत्वमा गठिन छानबिन समितिले एसएसबीका जवानले तुइनको लठ्ठा खुस्काएका कारण भएको भन्दै अपराधमा संलग्नलाई भारतबाटै अनुसन्धान गरी कारबाहीको दायरामा ल्याउन र धामीका परिवारलाई उचित राहत तथा क्षतिपूर्ती दिलाउन कूटनीतिक पहलअघि बढाउन सुझाव दिएको थियो ।

गत साउन १५ गते भारतको पाङला गाउँ नजिकै गस्कु इलाकामा खटिएका एसएसबीका जवानले लठ्ठा खुस्काउँदा दार्चुला ब्यास गाउँपालिका–२ का ३३ वर्षीय धामी महाकालीमा खसेर बेपत्ता भएका थिए । उनको अवस्था अहिलेसम्म अज्ञात छ ।