काठमाडौं उपत्यकामा आजदेखि बेलुकी आठ बजेपछि गाडी चलाउन नपाइने भएको छ । कोरोना संक्रमण दर बढदै गएको भन्दै उपत्यकाका तीनवटै जिल्लामा अत्यावश्यक बाहेक निजी तथा सार्वजनिक सवारी संचालनमा रोक लगाउन लागिएको हो । आजदेखि अत्यावश्यक सेवा, ढुवानीका सवारी साधन र उपत्यका प्रवेश गर्ने सवारी साधन बाहेकका अन्य निजी तथा सार्वजनिक सवारी साधनहरु बेलुकी आठ बजेभित्र आफ्नो गन्तव्यमा पुगिसक्नुपर्ने काठमाडौं जिल्ला प्रशासन कार्यालयले जनाएको छ ।

आजदेखि स्थानीय ढुवानी बिहान ९ देखि ११ बजेसम्म र अपरान्ह ४ बजेदेखि ७ बजेसम्म सञ्चालन गर्न पाइने छैन । जिल्ला प्रशासन कार्यालयहरूले आजदेखि थप कडाइ गर्दै भदौ ८ गतेसम्म निषेधाज्ञा थप गरेका हुन । यस्तै, शैक्षिक संस्थामा भौतिक उपस्थितिमा पठनपाठन गर्न नपाउने आदेशलाई कायमै राखिएको छ । सभासम्मेलन, पार्टी प्यालेस, सिनेमा हल, डान्सबारलगायत मानिसको भीडभाड हुने कार्यक्रम सञ्चालन गर्न रोक लगाइएको काठमाडौं प्रशासनले जनाएको छ ।