दार्चुलामा तुइन तर्ने क्रममा बेपत्ता भएका जयसिंह धामीको मृत्युको घट्नाको केन्द्रीय छानबिन टोलीले छानबिन कार्य सुरू गरेको छ । गृह मन्त्रालयका सहसचिव जनार्दन गौतम नेतृत्वको टोलीले घटनाको छानबिन कार्य सुरू गरेको जनाएको छ । घट्नाबारे छानविन गर्न काठमाण्डौँबाट मंगलबार साझ दार्चुला जिल्ला सदरमुकाम खलंगा पुगेको मन्त्रालयको टोलीले बुधबार पत्रकारहरुसंग घट्नाको विषयमा छलफल गरेको छ ।

छानविनका लागी आवश्यक सुचना तथा प्रमाण संकलन गर्न घट्नास्थल जानु पुर्व मन्त्रालयको टोलीले जिल्ला स्थित पत्रकार, मानव अधिकारकर्मी, राजनितिक दल र ब्याँस गाउँपालिकाका जनप्रतिनिधिहरुसंग छलफल गरेको हो । छलफलका क्रममा समितिका संयोजक गौतमले सो घट्नालाई नजिकबाट अनुसन्धान गरी छानविन गरिने बताए । टोलीले यसअघि बुधबार विहान सो घटनाकमा तिन जना प्रत्यक्षदर्शीलाई घट्नाका बारेमा सोधपुछ गरेको छ ।

उक्त घट्नाका प्रत्यक्षदर्शी कल्यान सिंह धामी, अनिता धामी र विक्रम सिंह रङकोलीलाई टोलीले घट्नाको वास्तविकता बारेमा सोधपुछ गरेको बुझिएको छ । प्रत्यक्षदर्शी, पत्रकार, मानव अधिकारकर्मी, राजनितिक दल र ब्याँस गाउँपालिकाका जनप्रतिनिधिको भनाई र घट्ना संग सम्बन्धित प्रमाणहरु संकलन तथा विश्लेषण गरी घट्नाको सत्यतथ्य बाहिर ल्याउने संयोजक गौतमले बताए ।