बाँकेको कोहलपुरमा रहेको डुडुवा खोला बन्दा मा पौडी खेल्ने क्रममा डुबेर तीन युवाको ज्यान गएको छ । कोहलपुर, १० रहेको उक्त स्थानमा बुधबार दिउँसो पौडी खेल्ने क्रममा डुबेर तीन जनाको मृत्यु भएको ईलाका प्रहरी कार्यालय कोहलपुरले जनाएको छ ।

मृत्यु हुनेमा नेपालगञ्ज सदरलाइनका १८ वर्षीय रसिद जसगढ, श्रृष्टि हल लाइनका १८ वर्षीय अरमान जसगढ र १७ वर्षीय आरिस जसगढ रहेका छन् ।

पौडी खेल्ने क्रममा डुबेका उनीहरुलाई कोहलपुर प्रहरीको टोली पुगेर खोजी गर्दा मृत अवस्थामा फेला पारेको थियो । प्रहरीले आवश्यक प्रक्रिया पु¥याएर तीनै जनाको शवलाई पोस्टमार्टमको लागि भेरी अस्पताल नेपालगञ्ज पठाएको छ ।

त्यसै गरि यता चितवनमा चितवनको भरतपुर महानगरपालिका वडा नं २ क्षेत्रपुरमा नहरमा डुबेर दुई किशोरको ज्यान गएको छ। जिल्ला प्रहरी कार्यालय चितवनका अनुसार स्थानीय नहरमा हातखुट्टा धुने क्रममा चिप्लिएर डुव्दा स्थानीय १६ बर्षको अंकित जोशी र वर्ष १४ को विवेक शर्माको मृत्यु भएको हो।

खेल मैदानमा क्रिकेट खेली नजिकै रहेको नहरमा हातखुट्टा धुने क्रममा विवेक शर्मा चिप्लिएर नहरमा खसेको र उनलाई बचाउन जाने क्रममा अंकित जोशी समेत नहरमा डुबी बेपत्ता भएकोमा उनीहरूको शब दुई सय मिटर तल डुबेको अबस्थामा भेटिएको थियोे।