निरन्तरको वर्षाका कारण महाकाली नदीमा पानीको बहाव बढेको छ । पानीको बहाव बढेसँगै कञ्चनपुरको दोधारा चाँदनी र भीमदत्त नगरपालिकाका केही बस्ती उच्च जोखिममा परेका छन् । महाकाली नदीमा शनिबार बिहान पानीको बहाव १ लाख ७० हजार क्युसेक थियो । दिउँसो दुई बजे पानीको बहाव बढेर १ लाख ९१ हजार क्युसेक पुगेको बताइएको छ ।

पहाडी जिल्लाहरूमा अझै वर्षा भइरहेकोले नदीमा पानीको बहाव थप बढ्ने हुँदा तटिय क्षेत्रका बस्तीमा बसोबास गरिरहेका नागरिकहरुलाई सतर्कता अपनाउन प्रशासनले अनुरोध गरेको छ । नदीमा पानीको बहाव बढेसँगै गएराति भीमदत्त नगरपालिका वडा नम्बर १२ ऐरी र दोधारा चाँदनीका केही बस्तीका दर्जनौँ घरमा पानी पसेको थियो । महाकाली नदीमा पानीको बहाव बढेपछि निर्माणाधीन चार लेनको पक्की पुल र पहुँच मार्गमा रहेका केही संरचनामा समेत क्षति पुगेको छ ।