लगातारको वर्षाका कारण डोटीको सेती नदीमा पानीको बहाव बढेको छ । बहाव बढेपछि जिल्ला प्रशासन कार्यालयले नदी आसपासका वासिन्दालाई सचेत रहन आग्रह गरेको छ । डोटीको गोपघाट र दिपायलमा रहेको बाढी मापन केन्द्रका अनुसार जलसतह मापनभन्दा अधिक बढेको हो ।

सेती नदीमा पानीको बहाव ८ लशमलव ४ क्युसेक पुगेको छ । यो खतराको चिन्हभन्दा माथि हो । बाढी मापन केन्द्रका अनुसार ३ दशमलव ५ क्युसेक बहाव हुँदा नदीमा बाढीको बढी खतरा हुने गर्दछ । बाढीले नदी आसपास धान रोपेका खेतमा कटान गर्न थालेको छ ।

बाढीका कारण जोखिम बढेको भन्दै प्रशासनले बानीडुग्रीसैन, गोपघाट, बारपाटा, सिरखोलीसैन, कालागाढ, रामपुर, दिपायल, घोल्तडा, भागेतडा, कैलडा तथा नारीदाङका स्थानीयलाई सचेत रहन आग्रह गरेको छ । साथै प्रशासनले नदीमा माछा मार्दै आएका नागरिकलाई केही दिन नदीमा नजानसमेत आग्रह गरेको छ ।