सोमबारदेखिको अविरल वर्षाका कारण मनाङ सदरमुकाम चामे नजिकै थुनिएको मर्स्याङ्दी नदी पूर्ण रुपमा खुल्न सकेको छैन । चामेको बजार क्षेत्र हुँदै झरेको घट्टेखोलाले ढुंगामाटो र काठदाउरा बगाएर ल्याएपछि मर्स्याङ्दी नदी आज करिब आधाघण्टा थुनिएको थियो ।

यसबाट चामेको पारीपट्टीको भाग डुबानमा परेको छ । सिंगो चामेबजार उच्च जोखिममा परेको छ । बाढीले चामेबाट माथिल्लो मनाङतर्फ जाने एकमात्र बेलिब्रिज समेत कटान गरेको छ । नदीको बहाब बढ्दै गएको र यसले चामेबजार थप जोखिममा पारेको जिल्ला प्रशासन कार्यालय मनाङले जनाएको छ । जिल्ला प्रशासन कार्यालयका अनुसार बाढीले ताल गाउँमा ३० घर, धारापानीमा ७ घर, पिसाङमा २ घरसहित जिल्लाभर ५५ घर भत्काएको छ ।

अहिलेसम्म मनाङमा ८ वटा झोलुङ्गे पुल, एउटा मोटरेवल पुल, ३ वटा काठको मोटरेवल पुल बाढीले बगाएको छ । बाढीका कारण मनाङमा एक गाउँबाट अर्को गाउँ जान समेत समस्या परेको छ ।