गण्डकी प्रदेशको मुख्यमन्त्रीमा कांग्रेस संसदीय दलका नेता कृष्णचन्द्र नेपाली पोखरेल नियुक्त भएका छन् । गण्डकी प्रदेश प्रमुख सीताकुमारी पौडेलले शनिबार उनलाई संविधानको धारा १६८ को ५ बमोजिम मुख्यमन्त्रीमा नियुक्त गरेकी हुन् ।

अब नेपालीले ३० दिनभित्र प्रदेशसभाबाट विश्वासको मत लिनुपर्छ । प्रदेश प्रमुखले सरकार गठनका लागि आह्वान गरेको दुई घण्टामै प्रदेश सभाका विपक्षी दलका नेता नेपाली बहुमत सदस्यहरुको हस्ताक्षर सहित प्रदेश प्रमुखको कार्यालय पुगेका थिए । उनले सशरीर ३१ सांसदसहित बहुमत पु¥याएर मुख्यमन्त्रीमा दावी पेश गरेका थिए ।

नेपाली मुख्यमन्त्रीमा नियुक्त भएसँगै गण्डकीमा नेकपा एमालेले सत्ता गुमाएको छ । प्रदेश सभाको सबैभन्दा ठूलो दलको नेताको रुपमा मुख्यमन्त्री नियुक्त भएका पृथ्वीसुब्बा गुरुङ प्रदेशसभाबाट विश्वासको मत प्राप्त गर्न नसकेपछि पद मुक्त भएका थिए ।