जनता समाजवादी पार्टीका अध्यक्ष महन्थ ठाकुरले नेपाल नागरिकता अध्यादेश २०७८ कार्यान्वयनमा रोक लगाउने सर्वोच्चको आदेशप्रति असन्तुष्टि व्यक्त गरेका छन् । शुक्रबार पार्टी कार्यालय बबरमहलमा नवनियुक्त उद्योगमन्त्री राजकिशोर यादवलाई बधाइ दिन आयोजित कार्यक्रममा उनले अदालतको आदेशबाट संतुष्ट हुन नसकेपनि आदेशलाई भने सम्मान गर्ने बताए । अध्यक्ष ठाकुरले सरकारलाई संसद नभएको बेलामा अध्यादेश ल्याउने अधिकार भएको भन्दै अध्यादेश पनि एक प्रकारको कानून नै भएको बताए ।

उपप्रधान एवं शहरी बिकास मन्त्री राजेन्द्र महत्तोले जसपा अव मुलुकको बैकल्पीक शक्ति भएको भन्दै अहिलेको अवसरलाई जनताका लागि सदूपयोग गर्नुपर्ने धारणा राखे । देश र जनताप्रति समर्पित भएर सवैले आफ्नो दायित्व पुरा गर्नुपर्नेमा उनको जोड थियो ।

नवनियुक्त उद्योगमन्त्री राजकिशोर यादवले सरकारमा रहेर मधेश लगायत देशका अन्य क्षेत्रमा रहेका जनताको समस्या समाधानका लागि काम गर्ने प्रतिवद्धता जनाए ।