गण्डकी प्रदेशमा नयाँ सरकार गठनका लागि विपक्षी गठवन्धनले दाबी पेस गरेका छन् । बहुमत ३१ सांसदको हस्ताक्षरसहित कांग्रेस संसदीय दलका नेता कृष्णचन्द्र नेपालीले प्रदेश प्रमुख सिताकुमारी पौडेल समक्ष दाबी पेस गरेका हुन् ।

उनलाई कांग्रेसका १५, नेकपा माओवादी केन्द्रका ११, राष्ट्रिय जनमोर्चाका २, जनता समाजवादी पार्टीका दुई र स्वतन्त्र सांसद राजीव गुरुङले समर्थन गरेका छन् । यो संख्या नेपालीलाई मुख्यमन्त्रीमा नियुक्त हुनका लागि आवश्यक संख्या हो ।

यसअघि आजै प्रदेश प्रमुख सीताकुमारी पौडेलले संविधानको धारा १६८ उपधारा ५ अनुसार नयाँ सरकारको दाबी गर्न आह्वान गरेकी थिईन् । प्रदेश प्रमुख पौडेलले नयाँ मुख्यमन्त्री नियुक्तिका लागि शनिवार दिउँसो ३ बजेसम्म आफ्नो दावी पेस गर्न समय दिएकी थिईन् । मुख्यमन्त्री पृथ्वी सुब्बा गुरुङले विहीवार प्रदेशसभाबाट विश्वासको मत प्राप्त गर्न नसकेपछि नयाँ सरकार गठन प्रक्रिया अघि बढाइएको हो ।