लुम्बिनी, कर्णाली र सुदूरपश्चिम प्रदेशको केन्द्र रहेको बाँकेका अस्पतालमा केही समय अघि कोरोनाका बिरामीको निकै चाप थियो । तर, अहिले नयाँ भर्ना हुने बिरामीमा कमी आएपछि अस्पतालका वेडहरु खाली हुन थालेका छन् ।

केही दिन पहिला मात्र बाँकेका अस्पतालमा कोरोनाका बिरामी भर्ना गर्नका लागि निकै सकस थियो । अस्पतालमा कोरोनाका लागि निर्माण गरिएका शैयाको क्षमताभन्दा धेरै बिरामी आउँदा टेण्ट लगाएर समेत उपचार गर्नु परेको थियो । तर, पछिल्ला दिनहरुमा नयाँ भर्ना हुने बिरामीमा कमी आएको अस्पतालहरुले बताएका छन् । भेरी अस्पताल नेपालगन्ज र मेडिकल कलेज कोहलपुरमा कोरोनाका बिरामीको चाप घटेपछि अन्य बिरामीको पनि उपचार हुन थालेको छ । अस्पतालको क्षमताभन्दा धेरै बिरामीको चाप हुँदा उपचारमा समस्या थियो । अहिले भने कोरोनाका बिरामीको उपचार सहज भएको छ ।

भेरी अस्पताल नेपालगन्जमा कुनै बेला दैनिक करीब ३ सय कोरोनाका बिरामी हुने गरेका थिए । ९३ प्रतिशतसम्म संक्रमण दर भएको बाँकेमा हाल ५० प्रतिशतभन्दा कम संक्रमित भेटिने गरेका छन ।

अस्पतालमा अहिले ५५ वेड खाली छन । बिरामीको अवस्था अनुसार एक अस्पतालबाट अर्को अस्पतालमा स्थानान्तरण गरी उपचारलाई प्रभावकारी बनाईएको जिल्ला जनस्वास्थ्य कार्यालयले जनाएको छ ।

कोरोनाका बिरामीका लागि समस्या खेप्दै आएका बाँकेका अस्पतालमा पछिल्लो समय वेडहरु खाली हुन थालेपछि नागरिकमा खुशी छाएको छ । जिल्लामा पालिकाहरुले निर्माण गरेका अक्सिजनसहित ८४६ वेड छन भने १५४ आइसियु, २४ भेन्टिलेटर र ५३३ अक्सिजनसहितका वेड छन् ।