प्रधानमन्त्री केपी शर्मा ओलीले लोकतन्त्रलाई कमजोर पार्न खोज्ने शक्तिहरु कमजोर हुदै गएको बताएका छन् । शनिवार पुनर्निर्मित ऐतिहासिक धरहराको उद्घाटन समारोहलाई सम्बोधन गर्दै प्रधानमन्त्री ओलीले लोकतन्त्रलाई कमजोर बनाउन प्रयास गर्ने सबै शक्तिहरु कमजोर हुदै गएको बताएका हुन् । उनले नयाँ शासकिय व्यवस्था संगै लोकतन्त्र सुदृढ हुदै गएको र लोकतन्त्रलाई कमजोर पार्न खोज्ने दक्षिणपन्थी प्रतिक्रियावादी शक्तिहरु कमजोर हुदै गएको बताए ।

धरहरा निर्माण हुनु सबै नेपालीका लागि खुसीको क्षण भएको भन्दै प्रधानमन्त्री ओलीले आ आफ्ना घरमा साँझ दिपावली गर्न सबैलाई आव्हान समेत गरे । पुर्ननिर्माणका काममा कोभिडले केही असर गरेपनि आवश्यक सतर्कता अपनाउँदै सरकारले विकास निर्माणका कामलाई निरन्तरता दिएको र निरन्तरको प्रयासले नै धरहरा पुनर्निमाण सम्पन्न भएको उनको तर्क छ । प्रधानमन्त्री ओलीले सम्मृद्ध नेपाल सुखी नेपाली बनाउने राष्ट्रिय अभियान अन्र्तगत सरकारले कोहि पनि भोकै नरहने गरि नेपाललाई विकसित राष्ट्र बनाउने प्रतिवद्धता जनाए ।

प्रधानमन्त्री ओलीले धरहरा निर्माणले नेपालीले चाहे सबै गर्न सक्छन् भन्ने सन्देश दिएको बताउँदै अब राष्ट्रलाई सम्पन्न र दाता राष्ट्रको रुपमा उभ्याउनुपर्ने आवश्यकता औल्याए । उनले सरकार आफूलाई आवश्यक पर्ने वस्तुहरुको उत्पादन आफैले गर्ने र आयातमुखी नभई उत्पादनमुखी बनाउने बाटोमा अघि बढेको बताए । कार्यक्रममा उनले आफ्नो कार्यकालमा भएको विभिन्न कामहरुको बारेमा जानकारी गराएका थिए ।