भारतको हरिद्वारमा आयोजित कुम्भ मेलामा सहभागि भएर पुर्व राजा ज्ञानेन्द्र शाह आज स्वदेश फर्किएका छन । धार्मिक भ्रमण सकेर आइतबार अपरान्ह स्वदेश फर्किएका पूर्व राजा शाहका समर्थकले त्रिभुवन विमानस्थलमा उनको भव्य स्वागत गरेका छन् । बाजा गाजा सहित विमानस्थल पुगेका समर्थकले ‘राजा आऊ,देश बचाऊ’, ‘हाम्रो राजा हाम्रो देश प्राणभन्दा प्यारो छ’लगायत नारा समेत लगाएका थिए । समर्थकले ल्याएका पुष्पगुच्छा लिएपछि उनी त्यहाँबाट बाहिरिएका थिए ।

हरिद्वारमा आयोजित कुम्भमेलामा संबोधन गर्दै पूर्वराजा शाहले हिन्दु धर्ममाथि बाह्य दबाब, प्रभाव, प्रलोभन र अतिक्रमण बढ्दै गएको भन्दै चिन्ता व्यक्त गरेका थिए । उनले हिन्दु धर्मको सभ्यता र संस्कृतिका आदर्शहरु विश्वकै मानवीय आदर्शहरुलाई डो¥याउने खालको भएका उल्लेख गर्दै हिन्दु धर्म र संस्कृतिको संरक्षणमाथि जोड दिएका थिए । निरंजन पीठाधिश्वर आचार्य महामंडलेश्वर स्वमी कैलासानन्द गिरीको विशेष आमन्त्रणमा उनी हरिद्वारमा आयोजित महाकुम्भ मेलामा सहभागि भएका थिए । हरिद्वार बसाईको क्रममा पूर्व राजा शाह कुमभ मेलाको शाही स्नानमा समेत सहभागि भएका थिए । यसैगरी उनी हरिद्वारस्थित पतञ्जली योगपीठको समेत अवलोकन गरेका थिए । पूर्व राजा शाहको यस भ्रमणमा उनकी पत्नी कोमल पनि सँगै थिइन् ।