प्रधानमन्त्री केपी ओलीले संसदमा विचाराधीन अवस्थामा रहेको एमसीसी सम्झौतालाई अघि बढाउन सबै दलहरुलाई आग्रह गरेका छन् । प्रधानमन्त्री निवास बालुवाटारमा आज बसेको सर्वदलीय बैठकमा प्रधानमन्त्री ओलीले एमसीसी सम्झौता रोकेर सभामुख अग्नि सापकोटाले अराजक र अनैतिक भूमिका खेलेको आरोपसमेत लगाए । बैठकमा प्रधानमन्त्री ओलीले सभामुखको भूमिप्रति असन्तुष्टि जनाउँदै एमसिसीलाई अघि बढाउनका लागि सहयोग गर्न दलहरुलाई आग्रह गरेको परराष्ट्रमन्त्री प्रदीप ज्ञवालीले जानकारी दिए ।

बैठकमा प्रमुख प्रतिपक्षी दल नेपाली कांग्रेसले पनि एमसीसीलाई अघि बढाउने सम्बन्धमा आफुहरु सकारात्मक रहेको भन्दै कार्यव्यवस्था परामर्श समितिमा बिजनेस लिएर प्रस्तुत हुन प्रधानमन्त्रीलाई सुझाव दिएको छ । एमसीसीलाई अघि बढाउने मात्रै नभई संसदलाई बिजनेस दिने, रिक्त स्थानमा उपनिर्वाचन गर्ने, उपसभामुखको निर्वाचन गर्ने र कोभिड महामारी नियन्त्रणका लागि प्रभावकारी कदम चाल्न सुझाव दिएको वरिष्ठ नेता रामचन्द्र पौडेलले बताए ।

बैठकमा नेपाली कांग्रेस, नेपाल मजदुर किसान पार्टी, जसपा र राप्रपा सहभागी भएका थिए । नेकपा माओवादी केन्द्र र एमाले नेपाल र खनाल पक्षका नेताहरु भने बैठकमा सहभागी भएनन् ।