जलस्रोत तथा सिंचाई विकास डिभिजन कार्यालय उदयपुरले एक योजनामा लक्षीत वर्गको प्राथमिकता भन्दा बाहिर काम गरेर बजेटको दुरुपयोग गरेको पाइएको छ ।बरुवाखोला मुहान भइ असारी–भुसुने सिचाइ योजना मर्मतको नाममा कार्यालयले लक्षित वर्गको प्राथमिकता भन्दा बाहिर काम गरेर बजेटको दुरुपयोग गरेको हो ।

नहरको माथिल्लो भेगमा मर्मत आवश्यक हुँदाहुदै नहरको पानी नपुग्ने पुछार भागमा आरसिसि ढलानसहितको काम भइरहेको छ । आम उपभोक्ताको हित विपरित सजिलो ठाउँमा असारीको पूर्वपश्चिम राजमार्गको कालोपत्रे सडक मुनी आरसिसि ढनालसहितको काम भईरहेको छ ।

४ लाख ८२ हजार ४ सय ९० रुपैया लगत इस्टिमेटको मर्मत कार्य कोटेशनमार्फत एक कन्स्ट्रक्सनलाई ४ लाख ८१ हजार ९ सय ७१ रुपैयामा काम दिइएको छ । ५ लाख भन्दा कम बजेटको योजना कार्यालय प्रमुखले कोटेशन मार्फत काम गराउन सक्ने प्रावधान रहेको भएपनि त्यो काम लक्षित वर्गको उच्चतम हितमा हुन जरुरी छ ।
नहरको माथिल्लो विभिन्न भागमा कमजोर ठाउँ रहेको र ती ठाउँहरुमा माटो र बोरा राखेर पानी ल्याउने काम भईरहेको छ, तर सरकारी बजेट भने अनावश्यक ठाउँमा लगाएर दुरुपयोग भएको उपभोक्ताहरुको आरोप छ ।

कार्यालय प्रमुखको मनोमानीबाट काम हुँदा लक्षितवर्गको ठूलो हिस्सा सरकारी बजेटबाट बन्चित भएको उपभोक्ताहरुको गुनासो छ । सरकारी बजेट एक रुपैया भएपनि लक्षित क्षेत्रका नागरिकहरुको हक, अधिकार लाग्ने गर्छ तर, त्यहाँ के कति बजेटमा कसले काम गरिदैछ भन्ने पारदर्शितासमेत नभएको उनीहरुको भनाई छ ।

भुसुने–असारी जल उपभोक्ता संस्था नविकारण नभएको कारण कार्यालयले कोटेशनमार्फत काम गराएको जनाएको छ । संस्था नविकारण नभएपनि योजनाको तल्लो, मध्ये र माथिल्लो सबै भेगका उपभोक्ताहरुलाई पारदर्शीढंगले समेटेर काम नगराउदा विवाद समेत आएको छ ।

उपभोक्ताहरुको संस्था नविकरण नरहेको र तल्लो भेगको उपभोक्ताहरुबाट माग आएकोले कोटेशनमार्फत काम गरिएको र आगामी दिनमा माथिल्लो भेगको समस्यालाई हेरी काम गरिने कार्यालय प्रमुखको भनाई छ ।