सर्वोच्च अदालतको फैसलाविरुद्ध नेकपा (माओवादी केन्द्र)ले गर्यो निवेदन दर्ता नेकपा एमाले र नेकपा (माओवादी केन्द्र)बीचको एकता खारेज गर्ने सर्वोच्च अदालतको फैसलाविरुद्ध नेकपा (माओवादी केन्द्र)ले पुनरावलोकनको लागि निवेदन दर्ता गरेको छ । दर्ता गरेपछि माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल प्रचण्डले पुनरावलोकन गरेर यथार्थ सार्वजनिक हुने बताएकाछन् ।

उनले रिट निवेदकले नाम मात्रको विषयमा निवेदन दिएकोमा अदालतले रिट बाहिर गएर निर्णय गरेकोमा यथार्थ सार्वजनिक गर्न पुनारावलोकन हुने विश्वास व्यक्त गरेकाछन् । एकता भैसकेको दल विभाजित हुने किसिमको अदालतको कदम अस्वाभाविक, अप्राकृतिक र राजनीतिक प्रवृतिको भएको बताउँदै पुनरावलोकनको लागि शीर्षस्थ नेताहरू नै अदालत पुगेका थिए ।

मंगलबार विहान ११:४० बजे सर्वोच्च अदालतमा पुनरावलोकनको लागि निवेदन दिन सर्वोच्च अदालतमा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल प्रचण्ड सहित शीर्षस्थ नेताहरू सर्वोच्च अदालतमा पुगकाहुन। अदालत पुग्नेहरुमा उनीसहित नारायणकाजी श्रेष्ठ, कृष्णबहादुर महरा, गिरिराजमणी पोखरेल, वर्षामान पुन, पम्फा भुसाललगायतको सहभागीता रहेको थियो । सर्वोच्च अदालतले गत फागुन २३ गते एकता बदर गरिदिएको थियो । त्यसलाई निर्वाचन आयोगले २०७५ सालमा दर्ता गरेर मान्यता दिएको थियो । आफ्नो नेतृत्वको नेकपा निर्वाचन आयोगमा दर्ता भएको भन्दै अध्यक्ष ऋषि कट्टेल निर्वाचन आयोगविरुद्ध सर्वोच्च अदालत गएका थिए।