नेकपा एमाले ओली समूहले वरिष्ठ नेता माधवकुमार नेपालसहित चार नेतासँग स्पष्टीकरण मागेको छ । पार्टी केन्द्रीय कार्यालयबाट गएका कर्मचारीले खामबन्दी स्पष्टीकरणपत्र बुझाएका हुन् ।

एमाले स्रोतका अनुसार वरिष्ठ नेता नेपाल र नेता सुरेन्द्र पाण्डेको पत्र उनीहरुका स्वकीय सचिवलाई बुझाइएको छ । तर नेपालका स्वकिय सचिव नितेश पौडेलले भने पत्र नबुझेको र आफूलाई यसबारे थाहा नभएको एभिन्यूज खबरलाई बताए । नेता भीम रावलले भने स्पष्टीकरणपत्र बुझ्न अस्वीकार गरेको बताइन्छ ।

गेटबाट भित्र छिर्न नदिएपछि कर्मचारीले टोखास्थित कोलोनीमा रहेको लेटर बक्समा पत्र छिराएर फर्किएका छन् । घनश्याम भुसालको भने मोबाइल स्वीच अफ रहेकाले उनको पत्र बुझाउन बाँकी रहेको एमाले कार्यालय स्रोतले जनाएको छ । शनिवार सम्पन्न एमाले केन्द्रीय कमिटी बैठकले पार्टीविरुद्ध गुटबन्दी गरेको, समानान्तर कमिटीहरु बनाउन थालेको र पार्टी तथा सरकारविरुद्ध षड्यन्त्र गरेको भन्दै चार नेतासँग स्पष्टीकरण लिने निर्णय गरेको थियो ।

स्पष्टिकरणपत्रमा ती अभियोगमाथि चित्त बुझ्दो स्पष्टीकरण तीन दिनभित्र पेश गर्न भनिएको छ । महासचिव ईश्वर पोखरेलले हस्ताक्षर गरेको पत्रमा तीन दिनभित्र चित्त बुझ्ने जवाफ नआएमा कारवाही किन नगर्ने भन्ने व्यहोरा उल्लेख रहेको छ ।