आन्तरिक तथा वाह्य पर्यटकलाई आकर्षित गर्न ढुङ्गे बगैचा निर्माण शुरु आन्तरिक तथा वाह्य पर्यटकलाई आकर्षित गर्न खोटाङको हलेसी तुवाचुङ नगरपालिकाले ढुङ्गे बगैचा अर्थात् रक गार्डेन निर्माण गर्न शुरु गरेको छ । ढुंगे बगैचाको निर्माणले महादेवस्थानको ककनीडाँडामा रहेका प्राकृतिक कलात्मक आकृतिका हजारौं वर्ष पुराना ढुंगाहरुको संरक्षणमा सहयोग पुग्ने विश्वास गरिएको छ ।

नेपालकै प्रसिद्ध धार्मिकस्थल हलेसी महादेवको मन्दिरबाट करिब दुई किलोमिटर माथि रहेको रमणीय ककनीडाँडामा भष्मासुरले महादेवलाई लखेट्दा महादेवको पाइला परेको स्थानमा कलात्मक आकृतिका ढुङ्गाहरू बनेको किंवदन्ती रहेको छ । तिनै ढुंगालाई बगैचाको रूपमा विकास गरी बार्षिक ५ लाख पर्यटक भित्र्याउने लक्ष्य नगरपालिकाले राखेको छ । ढुङ्गे बगैचा निर्माणका लागि ५३ लाख रुपैया बिनियोजन गरिएको छ भने अहिलेसम्म १० प्रतिशत काम सम्पन्न भएको छ ।

ऐतिहासिक ढुंगाको संरक्षण गर्दै बगैचा बनाउन सके नगरपालिकाको दीगो आम्दानीको स्रोत हुने र स्थानीयको जीवनमा पनि आर्थिक सुधार हुने स्थानीवासीको भनाइ छ । निमार्णाधिन रक गार्डेन अर्थात ढुङ्गे बगैँचाबाट सगरमाथा लगायतका हिमाल, सोलुखुम्बु, ओखलढुंगा, भोजपुर, उदयपुर, रामेछाप लगायतका जिल्लाको सहजै दृश्यावलोकन गर्न सकिने स्थानीयको भनाइ छ ।