नेपाली कांग्रेसका सभापति शेरबहादुर देउवाले प्रतिनिधिसभा विघटनविरुद्धको आन्दोलनमा फागुन ७ को मितिले विशेष ऊर्जा दिने बताएका छन । प्रजातन्त्र दिवसका अवसरमा शुभकामना सन्देश दिदै उनले फागुन ७ लाई कांग्रेसको नेतृत्वमा नेपालको आधुनिक इतिहास प्रारम्भ भएको गौरवमय दिनको रुपमा स्मरण गरेका हुन ।

सभापति देउवाले ७० वर्षअघि विसं २००७ कात्तिक २६ देखि प्रारम्भ ऐतिहासिक जनक्रान्तिले आजकै दिन १०४ वर्षको एकतन्त्रीय निरंकुश राणा शासनलाई समाप्त पारेर देशमा प्रजातन्त्रको स्थापना गरेको उल्लेख गरेका छन । सात सालको परिवर्तनले राजनीतिक परिवर्तन मात्र नभएकार आर्थिक, सामाजिक, सांस्कृतिक, शैक्षिक हरेक क्षेत्रमा यसले अग्रगामी परिवर्तनको मार्गप्रशस्त गरेको उनको भनाइ छ ।

राणा बिरुद्धको आन्दोलनपछि मध्ययुगीन सामन्ती अवस्थाबाट नयाँ युगमा नेपाल प्रवेश गर्नुका साथै प्रजातन्त्रसँगै बलियो राष्ट्रियताको आधार पनि सो दिनले निर्माण गरेको विज्ञप्तीमा उल्लेख छ । २०४६ को परिवर्तन र २०६२÷६३ को आन्दोलनमार्फत संघीयता र गणतन्त्रसम्मको यात्राको जननी पनि फागुन ७ को क्रान्ति नै भएको देउवाद्वारा जारी विज्ञप्तीमा उल्लेख छ ।