-
काठमाडौं । अन्तरिम सरकार गठन प्रक्रियालाई अन्तिम चरणमा लैजाने उद्देश्यले आज राष्ट्रपति रामचन्द्र पौडेल, नेपाली सेनाको नेतृत्व र जेनजी युवा प्रतिनिधिहरूबीच निर्णायक छलफल हुने भएको छ ।
प्रधानमन्त्री केपी शर्मा ओलीले युवा आन्दोलन चर्किएपछि पदबाट राजीनामा दिएसँगै ताजा जनादेशका लागि अन्तरिम सरकार बनाउने तयारी भएको हो । भ्रष्टाचारविरुद्ध र सामाजिक सञ्जालमाथिको प्रतिबन्ध हटाउन माग गर्दै भएको आन्दोलनमा १९ जनाको ज्यान गएपछि युवाहरुले नयाँ नेतृत्वको खोजी अघि सारेका थिए ।
जेनजी युवाहरुले अन्तरिम प्रधानमन्त्रीका लागि पूर्वप्रधानन्यायाधीश सुशीला कार्कीको नाम सर्वसम्मत रूपमा अघि सारेका छन् । आज हुने छलफलले कार्कीलाई प्रधानमन्त्री बनाउने प्रक्रियालाई औपचारिकता दिने बुझिएको छ ।
नेपाली सेनाका प्रवक्ता राजाराम बस्नेतका अनुसार, राष्ट्रपति पौडेल, प्रधानसेनापति अशोकराज सिग्देल र जेनजी प्रतिनिधिहरूबीच बिहीबार बिहानदेखि छलफल सुरु हुने र त्यसैबाट निकास खोजिने अपेक्षा गरिएको छ ।
यसअघि काठमाडौं महानगरपालिकाका मेयर बालेन शाह, धरान उपमहानगरपालिकाका प्रमुख हर्क साम्पाङ लगायतले पनि कार्कीलाई समर्थन जनाइसकेका छन् । व्यावसायिक समूहका प्रतिनिधि दुर्गा प्रसाईंले भने “देशले निकास पाउने हो भने जसको नेतृत्वमा सरकार बने पनि स्वीकार्छु” भन्ने अभिव्यक्ति दिएका छन् ।
जेनजी युवाहरुले भर्चुअल माध्यममार्फत गरेको भोटिङमा समेत कार्कीको नाममा ठूलो समर्थन देखिएको थियो । कार्की स्वयंले पनि “युवाको चाहना अनुसार अन्तरिम सरकारको नेतृत्व गर्न तयार छु” भन्ने प्रतिक्रिया दिएकी छिन् ।
