युक्रेनको रुसी फौज राजधानी किभको उत्तरी क्षेत्रमा प्रवेश गरिसकेको बताएको छ । युक्रेन प्रवेश गरेको दोश्रो दिनमै रुसी फौज राजधानी किभ आइ पुगेको युक्रेनी श्रोतलाई उदृत गर्दै बीबीसीले जनाएको हो ।

यसैबीच युक्रेनी राष्ट्रपति भोलोदिमिर जेलेन्स्कीले युरोपेली नेतृत्वको आलोचना गरेका छन् । राजधानी किभस्थित आफ्नै कार्यालयबाट एउटा भिडियो सन्देश जारी गर्दै उनले पूर्व प्रतिबद्धता अनुरुप युरोपले रुसी फौजलाई युक्रेन प्रवेश गर्नबाट रोक्न आवश्यक सहयोग नगरेको बताएका हुन् ।

उनले ‘दोश्रो विश्वयुद्धमा जस्तो फेरि कहिलै नहुने बताउने युरोपेली मुलुकहरु उस्तै घटना अहिले युक्रेनविरुद्ध भइ रहँदा चुपचाप बसेको’ आरोप पनि लगाएका छन् । भिडियोमा उनले अझै पनि ढिलो भइ नसकेको भन्दै रुसी फौजलाई राजधानी किभ कब्जा गर्नबाट रोक्न सहयोग गर्न युरोपेली मुलुकसँग आग्रह पनि गरेका छन् । उनले युक्रेनको अस्तित्व नै संकटमा पर्ने त्रास बढेको भन्दै तत्काल रुसी आक्रमण रोक्नेबारे प्रयास थाल्न विश्व समुदायलाई आग्रह पनि गरेका छन् । उनले युक्रेनी नागरिकलाई मुलुकको रक्षाका लागि सक्दो सहयोग गर्न पनि आह्वान गरेका छन् ।