नेपाली कांग्रेसका युवा नेता गणेश लामालाई बिहीवार दिउँसो पोखरामा प्रहरीले नियन्त्रणमा लिएको छ। उनलाई प्रहरीले होटल पोखरा बुटिकबाट भागेर क्याटवाक रेस्टुरेन्ट पुगेका बेला घेरा हालेर नियन्त्रणमा लिएको हो।

गण्डकी प्रदेश सभामा मुख्यमन्त्री पृथ्वीसुब्बा गुरुङले विश्वासको मत लिने कार्यसूची भएका बेला काठमाडौंबाट पोखरा पुगेका उनी लेकसाइडको खहरेस्थित पोखरा बुटिकमा बसेका थिए। लामा पोखरा आउनुलाई राजनीतिक चलखेल गर्न आएको आशंका गरिएको छ। कांग्रेसबाट चुनावसमेत लडेका लामाको विगतमा ‘गुन्डा’को छवि छ।