कोभ्याक्सले नेपाललाई कोभिसिल्डको खोपको बिकल्प खोज्न सुझाएको छ । कोभ्याक्सले मे वा जुन महिना सम्ममा कोभिसिल्ड खोपको बाँकी डोज उपलब्ध गराउने भनेपनि अहिले उक्त खोपको विकल्पमा नयाँ खोप खोज्न नेपाललाई आग्रह गरेको हो ।

कोभ्याक्सले सुरुवातमा सबै कोभिसिल्ड खोप नै दिने भने पनि भारतीय कम्पनि सेरमले तत्काल खोप उपलव्ध गराउन नसक्ने जानकारी गराएपछि विकल्प माग गरेको हो । सेरमले तत्काल खोप दिन नसक्ने भएपछि कोभ्याक्सले विकल्पमा अर्को कुन खोप नेपालका लागि उपयुक्त हुन्छ भनेर सोधेको स्वास्थ्य सेवा विभागले जानकारी गराएको छ ।

कोभ्याक्सले नेपाललाई कुल जनसंख्याको २० प्रतिशतका लागि खोप उपलब्ध गराउने प्रतिवद्धता जनाएको थियो । कोरोना विरुद्धको खोप कम विकसित, विकासशील, विकासोन्मुख देशहरुमा समान वितरणका लागि बनेको ग्लोबल एलाइन्स कोभ्याक्स फ्यासिलिटीले नेपालमा पहिलो चरणमा ३ लाख ४८ हजार डोज खोप उपलब्ध गराएको थियो ।