काठमाडौँमा कोरोना संक्रमणको जोखिम बढ्दै गए पनि स्वास्थ्य सावधानी विनै सार्वजनिक सवारीसाधन निर्बाध रुपमा सञ्चालन भइरहेको गुनासो आएपछि जिल्ला प्रशासन कार्यालयको टोलीले अनुगमन गरेको छ ।

बिहीबार काठमाडौंको बिभिन्न चोक चोकमा पुगेर अनुगमन टोलीले सार्वजनिक सवारीसाधनमा स्वास्थ्य सावधानी अपनाएको वा नअपनाएको बारे अनुगमन गरेको हो । अनुगमनका क्रममा मास्क प्रयोग नगर्ने र गाडीमा स्यानिटाइजर नराखेको पाइएकाले चेतावनी दिइएको जिल्ला प्रशासन कार्यालय काठमाडौँका शाखा अधिकृत राम बहादुर सार्कीले बताए । उनले कोरोनालाई मध्यनजर गरी काठमाडौंमा सार्वजनिक सवारीसाधान सञ्चालन तथा यात्रामा लागू गरिएको नयाँ नियम पालना नगरे कारवाही गर्ने चेतावनी दिए ।

प्रशासन कार्यालयले सार्वजनिक यातायातमा सिट क्षमताभन्दा बढी यात्रु नराख्ने, सबै यात्रुलाई मास्क अनिवार्य गराउने, सवारीसाधनको ढोकामा र भित्र सेनिटाइजर व्यवस्था गर्ने लगाएतका नियम लागू गरेको छ । अनुगमन टोलीमा ट्राफिक महाशाखा र यातायात व्यवसायीको पनि प्रतिनिधित्व रहेको थियो ।