नेकपा एमालेको खनाल–नेपाल पक्षीय सांसदहरुहरुले पार्टी अध्यक्ष केपी ओलीले सोधेको स्पष्टिकरणको जवाफ बुझाएका छन् । संघीय संसदका २७ सांसदले एमाले प्रमुख सचेतक विशाल भट्टराईलाई स्पष्टीकरणको जवाफ बुझाएको खनाल नेपाल समूहले जनाएको छ ।

खनाल–नेपाल समूहका सांसदहरुले काठमाडौँको बुद्धनगरस्थित नेतृ सहाना प्रधान प्रतिष्ठानमा छलफल गरेर तयार पारेको जवाफ बुझाएका हुन् । जवाफमा सांसदहरुले आफूहरुलाई लगाईएको आरोप निराधार, कपोलकल्पित र पूर्वाग्रहबाट ग्रसित रहेको बताएका छन् । सांसदहरुले गलत काम सच्याउन खोज्नुलाई अलग पार्टी खोलेको रुपमा बुझ्न नहुने पनि बताएका छन् ।

आफूहरु पार्टीविरुद्ध नभई पार्टीको नवौँ महाधिवेशनबाट पारित राजनीतिक प्रतिवेदन, विधान तथा त्यसको आधारमा निर्मित नियमावलीको प्रतिरक्षाका लागि क्रियाशिल रहेको जिकिर उनीहरुले गरेका छन् । उनीहरुले सर्वोच्चको फैसलाले एमाले ब्यूँतिएसँगै पार्टीको सम्पूर्ण संरचना र बैठक पूर्ववत कायम हुनुपर्ने भन्दै बैध बैठकको माग गर्नु आफूहरुको दायित्व रहेको समेत बताएका छन् । सांसदहरुले पार्टी अध्यक्ष ओलीले चालिरहेको कदम पार्टी विधान विपरित र नेपालको कम्युनिष्ट आन्दोलन नै समाप्त पार्ने प्रकृतिका रहेको भन्दै सबै प्रक्रिया रोकी पार्टीलाई एकतावद्ध गर्न आवश्यक पहल गर्न समेत आह्वान गरेका छन् । उनीहरुले अध्यक्ष ओलीले आफ्नो कदम नसच्याए त्यसले निम्त्याउने दुष्परिणामको भागीदार पनि ओली नै हुनुपर्ने बताएका छन् ।

ओलीले संघ र प्रदेशका गरी नेपाल र खनाल पक्षका ३२ जना सांसदलाई विधानविपरीत पार्टी र सरकारविरुद्ध उत्रिएको र छुट्टै पार्टी गठनमा लागेको आरोपसहित स्पष्टिकरण सोधेका थिए ।