शुक्रबार महानगरीय प्रहरी कार्यालय रानीपोखरीले विस्फोटक पदार्थ युरेनियमसहित पक्राउ परेका ४ जनालाई सार्वजनिक गर्‍यो । बिहीबार काठमाडौंबाट पक्राउ परेका उनीहरुको साथबाट साढे २ किलो युरेनियम बरामद गरिएको थियो । सम्भवतः नेपालमा युरेनियम बरामद भएको पहिलो घटना हो ।

प्रहरीका अनुसार बरामद पदार्थ युरेनियम भन्ने पुष्टि खुमलटारस्थित नास्टको प्रयोगशालाबाट भइसकेको छ, जसको विस्तृत विवरण आइतबारसम्म आइपुग्ने कार्यालयका प्रमुख एआईजी हरिबहादुर पालले बताए ।

उनका अनुसार बरामद यूरोनियमको मूल्य करिब ५–६ अर्ब पर्ने अनुमान गरिएको हो । करिब २० वर्षअघि भारतबाट एक व्यक्तिले उक्त युरेनियम नेपाल ल्याएको र ती व्यक्ति हाल अमेरिकामा रहेको एआईजी पालले बताए ।