सञ्चार तथा सूचना प्रविधिमन्त्री पार्वत गुरुङले सरकार र बिप्लव समूह बीचको वार्ता सफल भएको र अब मुलुकमा शान्ति हुने बताउनुभएको छ ।

नेपाल दूरसञ्चार प्राधिकरणको २३ औँ वार्षिकोत्सवका अवसरमा बिहीबार काठमाडौंमा आयोजित कार्यक्रममा उहाले मुलुकलाई स्थायीत्व र शान्तितर्फ अघि बढाउन नै बिप्लव समूहलाई राजनीतिको मुलधारमा ल्याउन खोजिएको बताउनुभयो । उहाले अब राजनीतिक अस्थिरताको अन्त्य हुने बताउँदै यसबाट नेपालमा लगानीमैत्री वातावरण सिर्जना हुने बताउनुभयो ।

उहाले केहि दलले प्रधानमन्त्री पदलाई सट्टाबाजीको रुपमा बुझेको भन्दै प्रधानमन्त्री जस्तो गरिमामय पदमाथि खेलवाड गर्न नहुने धारणा राख्नुभयो ।

मन्त्री गुरुङले राजनीतिक गढबढीका कारण बिचलित हुनुपर्ने अवस्था नरहेको स्पष्ट पार्नुभयो । सरकार परिवर्तनका कारण कुनै संस्थाको कामकारवाही प्रभावित हुन नहुने उहाको भनाई छ ।

उहाँले प्राधिकरणका सेवालाई सुलभ, गुणस्तरीय, विश्वसनीय र भरपर्दो तुल्याउन सुझाव दिनुभयो । अब पूर्वाधारको विकाससँगै सेवालाई गाउँसम्म पु¥याउन जरुरी रहेको उल्लेख गर्नुभयो । मन्त्री गुरुङले दूरसञ्चार सेवालाई अन्तरराष्ट्रिय प्रतिस्प्रर्धामा ल्याउन त्यसको अनुसन्धान र समीक्षा गर्नुपर्ने औँल्याउनुभयो ।

प्राधिकरणका अध्यक्ष पुरुषोत्तम खनालले हालसम्म काठमाडौँ उपत्यकाबाहेकका ५४२ स्थानीय तह, चार हजार ४१२ वडा कार्यालय तीन हजार १२६ स्वास्थ्य केन्द्र र तीन हजार ७१४ सामुदायिक विद्यालयमा इन्टरनेटको पहुँच पु¥याइएको जानकारी दिनुभयो ।