सरकारी कर्मचारीहरुको सञ्चयकोष, निवृत्तभरणकोष र सापटी भुक्तानी रकम कारोबारको बास्तविक समयमा नै व्यक्तिगत खातामा जम्मा हुने भएको छ । विद्युतीय सरकारी लेखा प्रणाली मार्फत विद्युतीय कोष हस्तान्तरण गरी सरकारी निकायका कर्मचारीहरुको सञ्चयकोष, निवृत्तभरणकोष र सापटी भुक्तानी रकम तत्काल व्यत्तिगत खातामा लेखांकन गर्ने प्रणालीको बुधबार शुभारम्भ भएको छ । महालेखा नियन्त्रक कार्यालयमा भएको कार्यक्रममा अर्थ मन्त्रालयका राजस्व सचिव एवं कर्मचारी सञ्चय कोषका अध्यक्ष रामशरण पुडासैनी र महालेखा नियन्त्रक मधुकर मरासिनीले संयुक्तरुपमा शुभारम्भ गरेकाहुन । कार्यक्रममा राजस्व सचिव पुडासैनीले यो प्रणाली सरकारी लेखा प्रणालीको सुधारका लागि कोषेढुंगा भएको बताए ।

कार्यक्रममा महालेखा नियन्त्रक मधुकुमार मरासिनीले यो प्रणालीले लेखा प्र्रणालीमा ठूलो सहयोग पुग्ने बताए । यस किसिमको प्रणालीको विकासले पारदर्शिता कायम गर्ने कार्यमा सघाउ पुग्ने पनि उनले बताए । कर्मचारी सञ्चय कोषका प्रशासक तुलसीप्रसाद गौतमले विधुतीय सरकारी लेखा प्रणालीको कार्यान्वयनबाट कर्मचारी सञ्चय कोषको फाँटबारी संकलन कार्यमा सरलिकरण र सहजिकरण हुने बताए ।यो प्रणाली कार्यान्वयनमा आएसँगै कारोबारको बास्तविक समयमा नै सञ्चय कोष, निवृत्तिभरण कोष तथा सापटी भुक्तानी हुने भएकोले सञ्चय कोष रकम ब्यक्तिगत खातामा जम्मा नहुने, हराउने, दोहोरो प्रविष्टि हुने, घटी बढी दाखिला हुने तथा एकै व्यक्तिका धेरै वटा खाता रहने लगायतका समस्याहरु समाधान हुने बताइएको छ ।