स्वास्थ्य तथा जनसंख्या मन्त्रालयले कोरोना जोखिमयुक्त क्षेत्रमा एन्टिजेन परीक्षण र कन्ट्याक्ट ट्रेसिङ बढाउन निर्देशन दिएको छ । बुधबार कोभिड–१९ मिडिया ब्रिफिङमा प्रवक्ता डा जागेश्वर गौतमले कोभिड संक्रमण बढ्न सक्ने भन्दै देशैभरका प्रमुख जिल्ला अधिकारीहरुलाई कुनै पनि जुलुस, भीडभाड, सभा, सम्मेलन, भेला आयोजना गर्न नदिन अनुरोध गरे ।

चैत १८ गते बसेको इन्सिडेन्ट कमान्ड सिस्टम (आइसिएस) बैठकबारे जानकारी गराउदै उनले सबै सरकारी तथा निजी प्रयोगशालालाई तयारी अवस्थामा राख्न र सरकारी प्रयोगशालामा जनशक्ति आवश्यकता भए जनशक्तिका लागि थप रकम माग गर्न सक्ने बताए ।

पछिल्लो तथ्थ्यांक अनुसार नेपालमा बुधबार थप १ सय ६२ जनामा कोरोना पुष्टि भएको छ । यो संगै नेपालमा कोरोना संक्रमितको संख्या दुई लाख ७७ हजार ३ सय ९ पुगेको छ । त्यस्तै थप ५९ जना संक्रमितले कोरोना जितेका छन् । हालसम्म नेपालमा दुई लाख ७२ हजार ७ सय ८६ जना संक्रमित निको भएका छन् ।

गत २४ घण्टामा कोरोनाका कारण कसैको पनि मृत्यु भएको छैन, नेपालमा हालसम्म तीन हजार तीस जनाले कोरोनाका कारण नेपालमा ज्यान गुमाएका छन् । नेपालमा हाल १४ सय ९३ जना आइशालेशन र ५९ जना क्वारेन्टाइनमा छन् । त्यस्तै हालसम्म २२ लाख ७१ हजार ३२७ वटा पिसिआर परिक्षण गरिएको स्वास्थ्य मन्त्रालयले जनाएको छ ।