इटहरी । नेपाली कांग्रेसका क्रियाशील सदस्य तथा १५औँ महाधिवेशनका लागि इटहरी–२ बाट सर्वसम्मत क्षेत्रीय प्रतिनिधि चयन भएका बाबुराम सुवेदी राजनीति, पत्रकारिता, सामाजिक सेवा र धार्मिक गतिविधिमा सक्रिय व्यक्तित्वका रूपमा परिचित छन्। लामो समयदेखि विभिन्न सामाजिक तथा संस्थागत अभियानमा जोडिँदै आएका सुवेदीले सञ्चार क्षेत्रमार्फत पनि समाजका विषय उठाउँदै आएका छन्।

वि.सं. २०४० सालमा धनकुटामा जन्मिएका सुवेदी हाल सुनसरीको इटहरी उपमहानगरपालिका–२ मा बसोबास गर्दै आएका छन्। समाजशास्त्रमा स्नातक गरेका उनले २०६१ सालदेखि नेपाली कांग्रेसमा सक्रिय राजनीति गर्दै आएका छन्। यसअघि नेपाल विद्यार्थी संघमा २०५९ देखि २०६५ सालसम्म आबद्ध भएर संगठन निर्माण तथा विद्यार्थी आन्दोलनमा भूमिका निर्वाह गरेका थिए।

२०६२/०६३ को जनआन्दोलनका क्रममा समेत सुवेदी सहभागी भएका थिए। आन्दोलनका क्रममा उनी घाइतेसमेत भएका थिए। राजनीतिक गतिविधिसँगै उनी नेपाल ट्रेड युनियन कांग्रेसमा पनि आबद्ध छन्। पार्टीको संगठनात्मक गतिविधिमा निरन्तर सक्रिय रहँदै आएका सुवेदी यसपटक इटहरी–२ बाट १५औँ महाधिवेशनका लागि सर्वसम्मत क्षेत्रीय प्रतिनिधि चयन भएका हुन्।

राजनीतिसँगै सुवेदीको पत्रकारिता यात्रा पनि लामो छ। उनी २०६० सालदेखि निरन्तर पत्रकारितामा सक्रिय छन्। सञ्चार क्षेत्रमार्फत स्थानीयस्तरका सामाजिक, राजनीतिक तथा सार्वजनिक सरोकारका विषय उठाउँदै आएका सुवेदी नेपाल प्रेस युनियनका केन्द्रीय सदस्य तथा नेपाल पत्रकार महासंघका केन्द्रीय परिषद् सदस्य हुन्।

उनी सूचना पोर्टल डट कमका सम्पादक तथा हलेशी महादेव मिडिया प्रा.लि.का अध्यक्षसमेत हुन्। यसअघि नेपाल पत्रकार महासंघ सुनसरीको सचिव तथा नेपाल प्रेस युनियन सुनसरीको सचिवको जिम्मेवारीसमेत सम्हालिसकेका छन्। पत्रकारिता क्षेत्रमा संगठनात्मक जिम्मेवारीसँगै उनले स्थानीय सञ्चार क्षेत्रको विकास र पत्रकारको पेशागत हितका विषयमा समेत काम गर्दै आएका छन्।

सुवेदीको सक्रियता राजनीतिक र पत्रकारिता क्षेत्रमा मात्र सीमित छैन। सामाजिक तथा धार्मिक गतिविधिमा समेत उनको संलग्नता रहँदै आएको छ। उनी सुवेदी कल्याण प्रतिष्ठानका केन्द्रीय उपकुलाधिपति हुन्। त्यस्तै, इटहरी–२ स्थित त्रिनेत्र मोक्षधाम १०८ शिवलिङ्ग सेवा समितिका अध्यक्ष तथा निर्माण समिति संयोजकको जिम्मेवारीमा समेत छन्।

सामाजिक सेवाका क्षेत्रमा माया घर नेपालसँग पनि उनको सम्बन्ध छ। उनी माया घर नेपालका सल्लाहकार तथा जग्गादाताका रूपमा जोडिएका छन्। त्यसैगरी धनकुटा–इटहरी सम्पर्क समाजका जग्गादाता तथा आजीवन सदस्यका रूपमा पनि उनले भूमिका निर्वाह गरिरहेका छन्।

राजनीति, पत्रकारिता, सामाजिक सेवा र धार्मिक अभियानलाई समानान्तर रूपमा अघि बढाउँदै आएका सुवेदीले आफ्नो सक्रियतालाई समुदायसँग जोड्ने प्रयास गर्दै आएका छन्। धनकुटामा जन्मिएर इटहरीलाई कर्मथलो बनाएका उनी इटहरी, सुनसरी तथा धनकुटासँग सम्बन्धित विभिन्न सामाजिक र संस्थागत गतिविधिमा निरन्तर सहभागी हुँदै आएका छन्।

बहुआयामिक क्षेत्रमा सक्रिय सुवेदीको आगामी राजनीतिक यात्रा भने नेपाली कांग्रेसको संगठनात्मक गतिविधिसँगै अघि बढ्ने देखिन्छ। इटहरी–२ बाट सर्वसम्मत क्षेत्रीय प्रतिनिधि चयन भएपछि पार्टीको महाधिवेशन प्रक्रियामा उनको सहभागिता थप महत्वपूर्ण बनेको छ।