सरकारले फागुन १ गतेदेखि सबै नागरिकलाई बुस्टर मात्रा खोप दिने भएको छ । कोरोनाविरुद्धको दुवै मात्रा खोप लगाएर ६ महिना पुगेका १८ वर्ष माथिका सबै नागरिकलाई बुस्टर खोप दिने स्वास्थ्य मन्त्रालयले जनाएको छ । शुक्रबार पत्रकार सम्मेलन गर्दै मन्त्रालयले बुस्टरको रुपमा कोभिशिल्ड, एस्ट्राजेनेका, मोडर्ना वा फाइजर खोप दिने निर्णय गरेको जानकारी दिएको छ । २०७८ साल असोजसम्म लक्षित जनसंख्याको एक तिहाईलाई पूर्ण खोप लगाउने लक्ष्य हासिल भैसकेको र २०७९ साल बैशाख मसान्तसम्म लक्षित सबै नागरिकलाई पूर्ण खोप प्रदान गर्ने लक्ष्य निर्धारण गरिएको समेत मन्त्रालयले जानकारी दिएको छ ।

दिगो विकास लक्ष्य हासिन गर्न सरकार र विकास साझेदारको संयुक्त पहलमा स्वास्थ्य क्षेत्र रणनीतिक योजना तर्जुमा कार्य शुरु गरिएको र आगामी दुई महिनामा लागत अनुमान सहितको मस्यौदा तयार हुने समेत मन्त्रालयले जनाएको छ ।