इटहरी । नेपाली सङ्गीत क्षेत्रमा फरक विषयवस्तु र नयाँ शैलीको प्रयोग गर्दै गणितीय अङ्कलाई आधार बनाएर तयार गरिएको लोक–आधुनिक गीत सार्वजनिक भएको छ। सिर्जनात्मक सोच, उत्कृष्ट सङ्गीत र आकर्षक दृश्य संयोजनका कारण गीतले सार्वजनिक भएसँगै दर्शक तथा श्रोताको ध्यान खिच्न थालेको छ।
युवेन्द्र साक्यको अफिसियल युट्युब च्यानलमार्फत सार्वजनिक गरिएको गीतमा युवा गायक युवेन्द्र साक्य र चर्चित गायिका गङ्गा गौतम आचार्यको सुमधुर स्वर सुन्न सकिन्छ। गीतका शब्द गङ्गा गौतम, युवेन्द्र साक्य, कुमारजङ्ग कार्की र ज्ञानेन्द्र कार्कीले संयुक्त रूपमा सिर्जना गरेका हुन्। त्यस्तै लय सङ्कलन पनि युवेन्द्र साक्य, कुमारजङ्ग कार्की र ज्ञानेन्द्र कार्कीले गरेका छन् भने सङ्गीत संयोजन राजु कार्कीले गरेका छन्।
गीतकी निर्माता चन्दा श्रेष्ठ हुन्। रेकर्डिङ कार्य पूर्वाञ्चल डिजिटल रेकर्डिङ स्टुडियोमा सम्पन्न गरिएको हो भने रेकर्डिस्टको भूमिका रुद्र श्रेष्ठले निर्वाह गरेका छन्। गीतको सम्पूर्ण प्राविधिक तथा साङ्गीतिक पक्षमा अनुभवी टोलीको मेहनत झल्किएको देखिन्छ।

गीतको म्युजिक भिडियो पनि उत्तिकै आकर्षक बनेको छ। भिडियोको कोरियोग्राफी केशव दियालीले गरेका छन् भने निर्देशन रोशन कमल पराजुलीले गरेका हुन्। छायाङ्कन तथा सम्पादनको जिम्मेवारी ब्रज क्रियसनका रिकेश बज्राचार्यले सम्हालेका छन्। आधुनिक प्रविधि र प्राकृतिक सौन्दर्यको संयोजनले भिडियोलाई थप जीवन्त र दर्शनीय बनाएको छ।
भिडियोको छायाङ्कन सुनसरीको धार्मिक तथा पर्यटकीय महत्त्व बोकेको चतरा क्षेत्रअन्तर्गत चकरघट्टीस्थित बोराबाँधमा गरिएको छ। हरियाली वातावरण, प्राकृतिक सौन्दर्य र रमणीय दृश्यहरूले गीतको भावलाई अझ प्रभावशाली बनाएका छन्।

नृत्य प्रस्तुतीकरणतर्फ इटहरीस्थित युनाइटेड थर्टिन डान्स एकेडेमीका कलाकारहरूको ऊर्जावान सहभागिता रहेको छ। उनीहरूको आकर्षक नृत्य र कलात्मक अभिव्यक्तिले भिडियोलाई थप सशक्त बनाएको छ।
सङ्गीत, शब्द, अभिनय, नृत्य र दृश्य संयोजनको उत्कृष्ट मेल रहेको यस लोक–आधुनिक गीतले नेपाली सङ्गीत क्षेत्रमा नयाँ प्रयोगको सम्भावना उजागर गरेको छ। गणितीय अङ्क जस्तो फरक विषयलाई सङ्गीतमार्फत प्रस्तुत गरिएको यो प्रयासलाई नेपाली सङ्गीत क्षेत्रको सिर्जनात्मक उपलब्धिका रूपमा हेरिएको छ। https://www.youtube.com/watch?v=49Ex–Hj9rQ