बाँकेको डुडुवा गाउँपालिकाका प्रमुखले ऐलानी जग्गामा आफ्ना नजिकका मान्छेलाईं बसोबासका लागि दिए पछि विवाद उत्पन्न भएको छ । सरकारी जग्गाको संरक्षण गरी व्यवस्थापन गर्नुपर्नेमा गाउँपालिका प्रमुख नै जग्गा हडप्न लागेको आरोप लागेको छ ।

बाँकेको डुडुवा गाउँपालिका वडा नं. ६ कालाबन्जरमा ऐलानी जग्गामा गिद्धेनजर परेपछि अहिले २ विगाहा जग्गामा भूमिहीन तथा सुकुम्बासीका नामबाट कब्जा भएको छ । डुडुवा गाउँपालिकाले अस्थायी प्रबन्ध भन्दै प्रमुखका निकट व्यक्तिलाइ बसोबास गर्न दिएपछि विवाद उत्पन्न भएको हो । सरकारीस्तरबाट ऐलानी जग्गाको खोजी गरी संरक्षण गर्नुपर्नेमा अस्थायी व्यवस्थापनका नाममा जमिन भएका र अन्य मानिसहरुलाई उपभोग गर्न दिएर सरकारी सम्पतीको दुरुपयोग भएको स्थानीयले आरोप लगाएका छन् । ऐलानी जग्गामा व्यक्तिहरु आएर कब्जा गर्न थालेपछि स्थानीय चिन्तित बनेका छन् ।

डुडुवा गाउँपालिका प्रमुख नरेन्द्रकुमार चौधरीले अस्थायी प्रबन्धका लागि छरिरएर रहेका मानिसलाई केही समयका लागि बस्न दिएको बताए पनि सोही गाउँपालिका वडा नं. ६ का वडाध्यक्ष मोहनराम मिश्र भने सरकारी जग्गा कसैको आदेशमा भूमिहीन सुकुम्बासीका नाममा कब्जा हुनु दुर्भाग्य भएको बताउँछन् । उनले जमिन कब्जा हुन थालेपछि आफुहरुले स्थानीय प्रशासन र प्रहरीमा जानकारी दिए पनि सुनुवाई नभएको गुनासो गरे ।

संरक्षण गर्ने निकाय नै यसरी विवादमा आएर ऐलानी जग्गामा व्यवस्थापनका नाममा कब्जा गर्न लगाएपछि यस्ता सरकारी सम्पत्ती कसले संरक्षण गर्ने डुडुवाका सचेत नागरिकले प्रश्न गरिरहेका छन् ।